Ua formacion tà transméter la lenga e la cultura occitanas
Lo CFPÒc Nqvèra Aquitània en aliança dab lo Conselh Departamentau deus Pirenèus Atlantics qu’apitè la formacion deus intervienents culturaus en occitan tà favorizar la transmission de la lenga e de la cultura dab tots los publics, e sustot los mainats. Aquera formacion qu’a per tòca d’aquesir competéncias en animacion culturau, en creacion e arrevirada de supòrts pedagogics, e en mediacion, gestion de projècte a l’entorn de las practicas culturaus.
De la formacion a l’intervencion
L’objectiu qu’ei de perméter aus participants de concéber e de miar accions concrètas suus lors territòris. La promocion 2025-2026 que’n hè ua demostracion de las beròjas dab mantuas iniciativas dejà realizadas en diferents contèxtes educatius, culturaus e associatius.
Sheis intervencions en 2026
Las personas formadas qu’an dejà permetut a sheis animacions culturaus en occitan d’espelir :
• Ua visita patrimoniau en occitan a l’entorn deu castèth de Pau dab Anaïs
• Ua creacion tà apréner en s’amusar dab la musica dab Christophe
• Un talhèr creatiu prepausat per Marie
• Ua animacion contada peus sendèrs deu bòsc de Mixe dab Marie-Laure
• Ua iniciacion au teatre d’ombras dab Orianne
• Un talhèr de pintrura musicau dab Thierry
Aqueras realizacions qu’amuishan la diversitat deus apròchis possibles tà har víver la lenga occitana peus maines deu patrimòni, de las arts, de la literatura orau o enqüèra de l’educacion artistica e culturau.
Ua dinamica qui s’ahorteish
En 2025-2026, que son d’ara enlà onze personas formadas qui son en capatge de prepausar animacions culturaus en occitan suu territòri. Aqueth hialat d’intervienents que contribueish a ahortir la preséncia de la lenga au près deus mainatges e per diferents lòcs.
Aquesta annada enqüèra, lo CFPÒc que fòrma 3 personas a l’intervencion culturau en occitan .
Har víver l’occitan en la vita vitanta
En mei de las competéncias aquesidas, aquera formacion que participa a la creacion d’ua vertadèra dinamica de transmission . En desvolopar navèths apèrs e navèras proposicions culturaus, los intervienents formats que contribueishen a har víver l’occitan a las practicas d’uei e a’u har accessible a publics navèths.
Lo CFPÒc Navèra Aquitània qu’ei urós de véder a espelir aqueths projèctes e d’acompanhar cada annada navèras iniciativas au servici de la lenga e de la cultura occitanas.
