Estagi immersiu en lenga e cultura occitana – Tots nivèus – Bearn

L’estagi immersiu en occitan qu’ei ua excellenta atruna de descobèrta o desvolopament de las competéncias lengatgèras.

Descobèrta e ahortiment de las nocions lingüisticas dab l’ajuda de mejans pedagogics diversificats : los cors, las visitas, las animacions, las activitats, que son autant de possibilitats d’ancorar los aprentissatges entà’n har sabers a tèrmi long. L’estagi immersiu qu’a tanben per mira de favorizar las interaccions enter participants, d’un medish grop de nivèu mes tanben d’un nivèu a l’aute, entà dar aus aprenents la hidança necessària entà progressar a l’orau.

Lo formador/la formadora que causeish e que procura los documents pedagogics necessaris au son cors.

Las visitas, sortidas e conferéncias que son anonciadas dens la planificacion de l’estagi.

Los aprenents que segueishen los cors en grop de nivèus de lenga (començants, intermediaris, avançats) e que son agropats entà las activitats.

La descobèrta de la cultura e de la lenga occitanas que s’empara suu programa de l’estagi e suu debanar pedagogic deu formador/de la formadora, dab un programa-tipe en ligar los cors lo matin e en debut de vrèspe (segon lo nivèu de lenga), e activitats en lenga en fin de matiada e fin de vrèspe dab l’ensemble deus aprenents.

Los repaishs que son pres amassa entà mantiéner au maximum l’immersion lingüistica desirada.

Avaloracion formativa peu formador au briu de l’annada e auto-avaloracion de la formacion peus estagiaris en fin de formacion (questionari de fin de formacion).

Si formacion professionau : avaloracion deus aquesits en fin de session (passatge de certificacion A2, B1 o DCLR occitan) e certificat de realizacion de formacion desliurada.